E bravi i muloni de Teo! I gà vinto anca l’ultima coi “vecioni” ex Rozzol, che nò mola mai e che i se diverti propio giogando ben e con grande grinta (e tantissima lealtà e sportività a dir el vero). Ma, come che se disi: “onore al merito” (che nò gò mai capì cossa che vol dire veramente). Nele partide che gò visto i muli gà veramente giogà con tanta determinaziòn, forsi ghe xè mancada un poca solo nela partida del andata coi riguttiani de Robi, ma con ordine, precision e decisamente bona tecnica.

E in questo se vedi la man del Unterjunior; no xè gnente cossa dir. Nol sarà un grandisimo palegiador, ma come alenador el xè propio bravo (ma nò, anca come palegiador nol xè mal, anzi). Insoma dele some, vinto el campionato! Ciò vinzer un campionato xè sempre più che bel e gò visto i muloni veramente contenti. In particolar Gabro, che me gà dito: “ciò finalmente, dopo venti ani de palavolo gò vinto un campionato!”. Ma cossa dir de tuti i altri: bravi tuti, veramente.

Bravi come giogadori e bravi come gruppo, come amici, che resta sempre la roba più importante. Bravo Lele, che xè sempre stà presente con la tecnica e con la testa e cò nol iera al massimo el se gà sempre meso a disposizion dela squadra; bravo Sandro che dal centro, con quela sua strana bala de secondo tempo (fora tempo) el xè stado imprendibile in tante partide e pò esempio pei altri, da bravo capitano; e Gabro, che nò gà mai fato i filoti de tiri in rede e fora col scapuzza cò la testa, sempre atento e con granda concentraziòn; bravo Dino, sempre, anca se nol iera stà ultima partida (e ghe femo stò grande “in culo ala balena” per l’esame) nonostante qualche (?) chilo de tropo, ma la voja sempre al 100%; bravo Guid8 che xè stado a disposizion per far de tuto (centro, banda, palegiador, secondo libero, fecondador…); bravo Gibbuz, che tanto gà migliorado in tuti i fondamentali e gà anca giogado ben drìo e davanti; bravo Vale, anca lui ’ssai migliorado in ricezion e in ataco (ma el sarà ancora mejo cò l’imparerà a star zito, almeno ogni tanto); bravo Cece che cò el xè andà in campo el gà sbaglià gnente (e questa xè sempre una grande qualità, specie tra i giogadori del Volley Club); bravo Mario, el nostro farmacista preferido, che, secondo mi, poderà diventar un bravo, bravisimo centralone; e el Nano? ciò devo dir che nol gà falà una partida, propio el xè diventà un libero sicuro, preciso, che iuta i altri e se ciol tute le responsabilità, una vera sorpresa in positivo (a parte qualche lieve incazzadura ogni tanto…); bravo e grazie a Bembo, che, ala ciamada de socorso al xè vignudo a dar una man (del resto un bravo dotòr devi esser a dispiosizion ogni ora del giorno e dela note… come che ghè ricorda anche la Bemba…..), comunque un piazèr vederlo de novo in braghete e majeta; e pò la punta de diamante, el Negro, l’oposto de qualità, l’omo vicente, el vero Nico! Bravo, quasi dotòr Spanio. Ocio che de qua a qualche ora dotòr veramente el sarà. E alora anca a lui un bel “in culo ala balena!, (sperando che dale parti dela Nova Zelanda nò sia dò balene che se disi una al altra: in culo a Nicolò!).
E pò el palegiador-coach-anima dela squadra. L’ex giovine Teounter.libero.it (anzi nò più libero, ma ghe và ben cussi e pò la mulona xè cocola). Devo dir che el xè stà bravisimo a convinzer el grupo a far el campionato, a alenar i muloni, a meterli in campo, a evitàr casini tra i giogadori, a mediàr, a parlàr. Se lo vedi Berlusconi, minimo minimo lo candida ale europee…..

Cossa altro gò de dir, se nò ancora: bravi muli, xè stà un piazer vederve giogàr. Propio un bel giogàr in tute le partide, col spirito e la voja giusta (quela che xè mancada in tante altre ocasioni con altri giogadori). Ma laseme dir ancora che xè stadi bravi anca i giogadori de Robi. Le due partide de andata e ritorno xè stade belissime e indiferente chi che gà vinto, tuti gà giogado veramente ben. Pecà che el campionato lo pol vinzer una sola squadra perchè anca lori meritava e meritava anca Robi che li gà alenai e preparai veramente più che ben.

Bon ‘desso granda festa; magnar, bever (de guar nò se parla, come sempre) e ciorse pel cul! Giusto cussì! E el prosimo ano? Ben bon vederemo, ne vinirà qualche idea.

Bravi muli e congratulazioni de tuto cuor!
Rudi